دور تانى

قد يأتيك الخبر مفجعا ف رسالة ع موبايلك قدر الله و ما شاء فعل دور تانى .

تتصدم بشدة و تقول : ليه أنا حليت و جاوبت ؟

بس يا ترى هى ديه الاجابات اللى كانت مطلوبة منك ؟

يا ترى عملت اللى عليك بجد و لا كنت بتخدع نفسك طول الوقت اللى فات ده ؟

هكذا تكون نتيجة امتحان الاخرة و لكن للاسف بدون دور تانى , حياتنا الدنيا مذاكرة و الموت هو يوم النتيجة , يا نجحت و الى روح و ريحان و الى رب راض غير غضبان , أو الى نار و عذاب ف القبر ويوم القيامة ثم نار جهنم و العياذ بالله من عذابهم جميعا , يوم يموت الانسان تكون تلك النهاية بلا رجعة .
مش عايزين نكون زى الناس دول

قال تعالى : ( حتى إذا جاء أحدهم الموت قال رب ارجعون لعلي أعمل صالحا فيما تركت كلا إنها كلمة هو قائلها ومن ورائهم برزخ إلى يوم يبعثون )

( يا ليتنى كنت ترابا)
( ياليتنى لم أوتى كتابى و لم ادر ما حسابى ياليتها كانت القاضية ما أغنى عنى ماليه هلك عنى سلطانيه خذوه فغلوه ثم الجهيم صلوه ثم فى سلسلة ذرعها سبعون ذراعا فاسلكوه )

يا ريت كانت هى حياة وحدة , بس لا ف بعث بعد الموت و حساب و عقاب أو ثواب .

ليه بنعيش ف الدنيا متجبرين ع الناس بالمال اللى ربنا أعطهولنا ؟

ليه اللى يملك كرسى يتحكم ف خلق الله بمزاجه ؟

ليه بينسى أنه حيموت ؟

ليه دايما ماشيين ف الحياة بننسى ان ربنا معانا ف كل وقت؟

ليه بننسى الملائكة اللى ع أكتافنا بتكتب كل صغيرة و كبيرة ؟

ليه بطلنا نخاف لما نسمع عن الموت و عذاب الاخرة ؟

ليه بنضيع ف وقتنا بلا حساب رغم أن كل لحظة ممكن تكون آخر لحظة ؟

احنا ف الدنيا ديه لينا هدف معين و هو عبادة الخالق عز و جل , و مش قصدى شعائر الدين من صلاة و صيام و خلافه و لكن كطريقة ف الحياة , ف بحثنا عن الرزق , ف الاكل و النوم و الزواج و كل شىء , حياتنا كلها لله وحده .

ليه بنعيش لنفسنا مش عشان نرضى ربنا ؟

ليه بناكل عشان الاكل حلو مش عشان يقيم صلبنا للسعى ف الحياة ؟

ليه بنشتغل عشان نجيب العربية و الشقة الفخمة مش عشان نكفى أنفسنا السؤال ؟

ليه بنتزوج عشان كل الناس بتتزوج مش عشان ده أمر ربنا ؟

محتاجين نصحح نيتنا عشان أوراقنا تتصحح صح و ناخد ع كل حاجة ثواب , ما نبقاش زى التلاتة اللى أول من تسعر بهم النار قارىء القران و المجاهد و المنفق للصدقات , ضيعوا عملهم القيم بسبب فساد النية .

ناس كتير بتقول ساعة لقلبك و ساعة لربك بس للاسف احنا ضيعنا معظم ساعاتنا لقوبنا و كروتنا الساعة اللى لربنا .

يقول تعالى ( وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَى * قَالَ رَبِّ لِمَ حَشَرْتَنِي أَعْمَى وَقَدْ كُنتُ بَصِيرًا * قَالَ كَذَلِكَ أَتَتْكَ آيَاتُنَا فَنَسِيتَهَا وَكَذَلِكَ الْيَوْمَ تُنسَى)

مفروض ف زمنا ده زمن الفتن نسمع عن الاخرة و الموت أكتر ما بنسمع عن الجنة لأن قلوبنا بقيت كالحجارة أو أشد قسوة .

أنا عارفة أننا بشر و خطائين و نغلط و نتوب

بس يا ترى دايما بنفتكر نتوب ؟

دايما بنحاسب نفسنا قبل ما ربنا يحاسبنا ؟

يوم القيامة يقف العبد بين ربه ليس بينهما ترجمان و يحاسب ربنا العبد ع كل صغيرة و كبيرة امام الناس جميعا و أنت بين اجابتين يا ما تقول ايوه يا رب عملت و شوف بقى حتكون مكسوف قد ايه من ربك , او تكذب و تقول لأ ما عملتش و ساعتها بقى ربنا يختم ع فمك و يجعل أعضائك تشهد عليك , و الحساب ده من أنواع العقاب أيضا دى حاجة مش سهلة خالص , اللهم أدخلنا الجنة بلا حساب و لا سابقة عذاب .

لازم نعيد حسابتنا و نتذكر الموت دايما .

قال رسول الله صلى الله عليه و سلم : اكثروا من ذكر هادم اللذات .

قال أحد العلماء و هو يمشى مع تلميذ له و قد مرت عليهم جنازة : أرئيت ان أعاد الله هذا الرجل الى الدنيا مرة أخرى ماذا يصنع ؟ رد الطالب : لأحسن الفرائض و زاد من العلم و فضائل الأعمال . قال العالم اعتبر نفسك مكان هذا الرجل و عدت فان فعلت مثل ما قلت نجوت .

الخلاصة أن ما ذاق جنة الاخرة الا من ذاق طعمها ف الدنيا يعنى ايه ؟؟

يعنى فيه جنة ف الدنيا جنة طاعة ربنا و رضاه و اللى يحصل الجنة ديه ف الدنيا حيحصل باذن الله الجنة ف الأخرة .

قال أحد السلف الصالح : ( لو يعلم الملوك وأبناء الملوك ما نحن فيه من النعيم لجالدونا عليه بالسيوف ) و كان يقصد بالذات نعيم قيام الليل و الخلو بربه .
قال الله تعالى :
( مَنْ عَمِلَ صَالِحاً مِنْ ذَكَرٍ أَوْ أُنْثَى وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً وَلَنَجْزِيَنَّهُمْ أَجْرَهُمْ بِأَحْسَنِ مَا كَانُوا يَعْمَلُونَ )
و فى برنامجين للشيخ محمد حسين يعقوب للتمتع بجنة الدنيا برنامج تذوق الثمرات و برنامج جنة الدنيا يمكن تحميلهم من النت للاستفادة .

يا رب كلنا ننجو من النار و نذهب للجنة .