اتكلى على الله و انا عليا المحشى

أنا : تسلم ايديك يا ماما ع المحشى

       يا ترى امتى حعرف اعمل محشى زيك كده ؟؟

       بصى يا ماما أنا لما اتجوز ان شاء الله تبقى تطبخيلى     معاكى
ماما : نعم ..!!!!  و انا حمشيكى ليه ؟؟
 أنا : معلش يا ماما انا زى بنتك برضه
ماما : و اللى معاكى ده مش حياكل يعنى ؟؟
 أنا : معلش يا ماما اعتبرى نفسك خلفتى عيل تالت بس كبير شوية
ماما : ده بدل ما تقوليلى يا ماما اساعدك
 أنا : معلش يا ماما ما انا حاجى اخد منك الاكل كل يوم
       بدل ما اقعد اجرب ف الراجل و يجيله تسمم و لا حاجة
ماما : خلاص خلاص اتكلى ع الله انت و انا على المحشى

انا فى سنة 6 و لسه ما قمتش بتجارب عملية معملية ف المطبخ يا لهووووى و لا فجرت حلل و لا كبيت الملح ف الاكل و لا اى حاجة
انا اقر و اعترف انا فاشلة ف المطبخ
مش انى ما اعرفش اعمل حاجة
لكن عشان ما جربتش
و بصراحة ماليش نفس
ما طبختش غير حاجتين بطاطس و بوفتيك مع انى قلت الاجازة ديه حكسر المطبخ من العمايل لكن ربنا ستر .

ماما ف يوم قالتلى انها مش بتعمل الاكل الحلو ده عشان خاطر عيونا يعنى لا كلا البتة ده عشان هى بتحب الطبخ هواية عندها  
ع كده  انا عيالى كده مش حياكلوا عشان انا بحب اتفرج ع الطبخ و هوايتى الكمبيوتر يبقوا ياكلوا سيديهات و لا يتصرفوا من اى حتة بقى .

بس للاسف حيجى عليا يوم و اطبخ
ربنا يستر و يطلع جوزى ما بيحبش الاكل او عامل ريجيم ع طول او بيحب يطبخ و يقولى يا حبيبتى انا مش عايز اشوفك ف المطبخ خالص و هو يعمل كل حاجة يا سلام  ( ف واحد جوز صاحبة ماما ما بيخليهاش تدخل المطبخ بس للأسف مالهوش اخوات اهىء اهىء  )

الحلقة ديه من عايزة اتجوز بتفكرنى بنفسى حلقة تحتمس و بتحسسنى بفشلى اه لو ماما عملت زى ماماتها

http://www.youtube.com/watch?v=jpiyifL8vwA

ربنا يخليكى لينا يا ماما و ميزعلكيش منا ابدا